公益金嘅「企業義工配對計劃」宗旨係拉近「施與受」嘅距離，甫推出就得到企業爭相支持，僱員嘅湧躍參與，更加為我哋打左一劑「強心針」。
今日，我哋同成班嚟自瑞士諾華製藥(香港)有限公司嘅年輕義工到公益金會員機構 - 匡智會轄下嘅匡智居參觀同工作。跟我嚟啦！
匡智會本著「匡扶智障」嘅精神，竭誠為智障人士同佢哋嘅家庭提供優質教育、適切嘅培訓同其他賦權嘅機會，幫助佢哋發展潛能。
咦，啱啱入門口，成班義工就停哂步。咩事呢？
原來係睇緊匡智居自家出產嘅新鮮有機蔬菜同最熱門產品 - 匡智果仁曲奇餅！賣相真係幾吸引~~~
參觀第一站-果仁曲奇餅製作中心，只要跟著曲奇同麵包嘅香味行，好快就搵到工作室。「全副武裝」嘅導師細心同大家介紹工作室運作同學員學習狀況。我就一邊聽，一邊猛吞口水。
工作室內窗明几淨，學員認真工作，每個人都戴上廚師帽同口罩，務必令產品質素同衛生都一級棒！
匡智居內有酒店服務訓練提供。
成個牆壁鋪滿畢業學員喺本港各大型酒店嘅工作照，果然名師出高徒，桃李滿天下。
唔講唔知，原來匡智居提供酒店服務式住宅，為市民提供服務之餘，又可以俾學員做實習。呢位學員同導師一齊向我哋介紹佢哋嘅服務，講得頭頭是道。
整潔雅緻嘅客房，全部由學員一手一腳打理，令人十分佩服！
松嶺餐廳係區內非常受歡迎嘅用餐熱點。可惜當日正值休息時間，未有機會一嚐學員嘅手勢。
碧恥軒 - 好優雅嘅名字！好奇嘅我哋馬上湊過去睇清楚。
匡智松嶺窰 - 「碧恥軒」陶瓷工場為15歲或以上輕、中度智障青年提供陶藝製作訓練，培養學員對陶藝嘅興趣，啟發佢哋嘅藝術潛能。
作品件件精緻，別具心思，完全可以登上大雅之堂！俾個LIKE佢！
參觀完設施，係時候「出手」啦！一大班義工兵分兩路，一組嚟到有機菜圃，另一班就去有機香草園。
有機菜同香草當然要用有機肥料。處理有機肥嘅小屋地處隱蔽，用野草同家禽排泄物為基本材料，氣味較淡，唔會影響周遭居民。
羅馬生菜翠綠誘人~~~
剛結莢嘅荷蘭豆睇落嫩綠可口，聽園丁/農夫講馬上可以收成一季。你哋留意下啲花仲好靚添！
想享受豐盛嘅收成，當然要由最基本做起，除草......
鬆土......
清除田中石塊，係必做動作。義工朋友個個做到冇停手。
匡智環保農莊嘅香草園，由公益金贊助，睇到佢哋嘅成績真係好驕傲！
香草需要細心呵護，「農夫」定時為香草噴水，一絲不苟。為咗善用土地，側邊嘅窄小地方種上粟米，仲擺埋「稻草人」防止雀仔偷食，別具心思。
農業專家蔡SIR為大家講解工作步驟同注意事項。
摸一下迷迭香草，手掌上瞬間留下迷人香氛，經久不散。
薄荷味道清新，深吸一口，全身暑熱頓時解咗大半。
經農業專家指導，義工握鋤嘅姿勢真係有板有眼。
除草、鋤草、再除草。
成績優秀，滿載而歸......
大家攜手合作，好快清出一片農地，聽日就可以種植香草啦！
辛苦咗成個下晝，終於踏上歸途。
大家歇下腳，嘆一杯寧神香草茶~~呃......點整架？？
當然有匡智學員親自示範，用嘅自然係自家生產嘅迷迭香同薄荷葉。
學員手勢純熟，刀法如神，睇到我哋眼花撩亂。
學員貼心送上一杯杯熱水，讓大家自己動手試做香草蜂蜜飲。
「哈！你咁都唔識。頭先瞌眼瞓唔聽書呢~~~？」(設計對白)
為咗慰勞一班勞苦功高嘅義工，學員送上剛出爐嘅香脆曲奇餅作謝禮。相中碟上面堆成小山嘅曲奇餅一眨眼功夫已經去咗大半，再眨眼全部清倉，非常受歡迎。
意猶未盡嘅名人當然唔放過買手信嘅機會。呢度嘅曲奇餅又係瞬間一掃而空。
活動總結，你哋見到班義工同匡智會員工各個笑意盈盈，就知道雙方都相當滿意今次活動啦！希望大家再接再厲，亦都多謝您哋嘅大力支持！
