一群來自香港蘇格蘭皇家銀行(RBS)嘅實習生，參加咗公益金嘅「企業義工配對計劃」，喺今個暑假為一班小朋友帶嚟又開心又有意義嘅一天！
上星期，佢哋一行五十幾人去到救世軍東涌家庭支援中心，將「英語遊戲Fun Fun Fun」帶俾一班小一至小六嘅學生，透過多個趣味橫生嘅遊戲，以生動活潑嘅形式教導小朋友學習英文生字，句子運用等。義工哥哥姐姐無分年齡界限，同小朋友打成一片，讓歡樂嘅笑聲充滿成個下午。
未正式分組遊戲之前，小朋友就先以「包剪揼」遊戲熱吓身！你又識唔識玩英文「包剪揼」呢？
就讀小一、小二嘅朋友，同十幾位義工哥哥姐姐分成兩組，單數代表貓，雙數代表老鼠，當聽到主持姐姐讀出相應嘅英文數字時，就要即刻捉實對方，被捉到嘅就要用英文介紹自己。
輸咗嘅義工同小朋友，就要用英語問對方嘅名字。識多個朋友，輸咗都特別開心！
輪到小三同小四嘅「紅豆配綠豆」合作遊戲。小朋友係紅豆，義工當然係綠豆啦。睇吓呢班小朋友幾踴躍？！
主持哥哥以英語要求紅豆配綠豆嘅數目，小朋友同義工就要即刻組隊。
點只紅豆綠豆咁簡單，大家仲要作故仔自我介紹一番。呢兩粒綠豆嘅表現令小紅豆睇到目瞪口呆。
義工同小朋友講英文手口並用，溝通全無障礙。
「聽指令」遊戲唔單止考驗大家英語聆聽能力同方向感，仲要反應快，慢啲啲都唔得。
嗱，有圖為證，玩到忘形就連左右都分唔到，俾人捉到正。
呢個遊戲將班房化身超市，小朋友同義工分為幾組，用有限嘅金錢購買食品，邊組買到最多就勝出。學到英文，仲要精打細算，個個都係精明消費者。
小五、小六嘅同學仔程度高D，義工就設計咗「拼字砌圖」遊戲，非常富挑戰性。
呢個英文字應該配番邊個字母先啱呢？
義工哥哥仲透過遊戲卡教大家英文生字，同埋用個詞語嚟造句。義工哥哥唔單止有童真一面，教導小朋友嘅時候，更有嚴肅嘅一面。
玩完遊戲，大家嚟張大合照留念。
睇見佢哋個個笑得咁開心，就知道「英語遊戲Fun Fun Fun」讓義工同小朋友都加「分」之外，仲令到整個下午都充滿「Fun」。
參與嘅小朋友將印有多謝嘅貼紙送俾義工哥哥姐姐。睇到呢位哥哥身上貼滿貼紙，就知道佢嘅受歡迎程度一定爆晒燈。
活動完畢，小朋友為大朋友評分，希望以後多D呢類遊戲活動就好啦！
