家傳戶曉嘅籌款活動「公益金便服日」，會喺九月三十號(國慶日前夕)舉行。
今年我哋再次沿用多年嚟深入民心嘅名字 - 「公益金便服日」，希望喚起更多上班族同埋學生嘅公益心，喺活動當日以輕裝便服返工返學，為弱勢社群帶嚟希望。善長只需捐出港幣六十元或以上，就可以參加「公益金便服日」。學生可以透過學校報名，而且不設最低捐款額！
踏入十九歲花樣年華嘅「公益金便服日」，會喺九月三十號舉行。你報咗名未？
活動開展儀式喺海運大廈展覽大堂舉行，工作人員忙於佈置會場，為活動做好準備。
開展儀式特備節目 - 時裝表演。由一班嚟自滙豐、恒生銀行、德勤‧關黃陳方會計師事務所、安永會計師事務所，同埋畢馬威會計師事務所嘅同事傾力演出。同大家分享下靚衫配搭嘅貼士。
Portfolio派出義務專業化妝師，令今次嘅時裝表演更臻完美。
公益金籌募委員會聯席主席余錦基 先生身體力行，率先以便服打扮出席開展儀式。
開展儀式仲邀請到政務司司長唐英年 先生擔任主禮嘉賓。
儀式開始時，「公益金便服日」籌委會主席馮孝忠 先生致辭，呼籲各界踴躍參與。
除咗主禮嘉賓唐英年司長(左三)之外、公益金執行委員會主席梁高美懿 女士(左二)、籌募委員會聯席主席余錦基 先生(右一)及「公益金便服日」籌委會聯席主席王庭聰 先生(左一)同一眾委員均有出席儀式，以示支持。
唐英年司長同時亦都係「公益金便服日」嘅活動贊助人，當然要幫手呼籲！
近年，「公益金便服日」邀請本地年青設計師設計多款宣傳品，為活動注入更多清新活力。今次公益金好開心能夠邀請到Chocolate Rain 設計總監Prudence麥雅端小姐為「便服日」宣傳品設計多款活潑可愛嘅公仔，令活動生色不少。
Prudence (左)話「便服日」係個好開心嘅日子，佢要帶晒Chocolate Rain嘅朋友嚟支持，透過呢啲色彩繽紛嘅公仔，帶動全城一齊參與「便服日」。
精彩嘅時裝表演贏得一片掌聲，呢班業餘模特兒一啲都唔怯場，擺pose絶對可以同專業模特兒媲美。
個個充滿青春朝氣，同時帶嚟輕裝便服嘅靈感，請大家俾個「讚」佢哋啦?
年青偶像李治廷Aarif亦親自上陣。
當然唔少得Aarif 嘅好拍檔Janice Man 文詠珊啦！
睇咗兩位明星模特兒嘅落力表演，你有冇得到一啲「便服日」新look靈感呢?
Aarif同Janice同大家分享佢哋做善事嘅經驗。今次係佢哋第二次拍檔亮相公益金活動，之前仲喺公益金嘅電視籌款節目入面表演過魔術籌款添！
今次佢哋再度為「公益金便服日」做宣傳，呼籲多啲善長出錢出力。
喺活動尾聲，一眾主禮嘉賓齊齊為「便服日」打氣。
一眾主禮嘉賓、籌委會成員及贊助機構，呼籲廣大市民支持「便服日」。
「公益金便服日」等緊你哋支持，快啲報名參加啦！
