為左讓大家更了解公益金點樣透過資助148間會員社會福利機構，幫助香港有需要嘅社群，我地特別製作《公益金 • 香港心》節目，請嚟受惠人士親身分享自己嘅故事。一連十集嘅電視特輯將會由1月10日至21日，逢星期一至五晚送上，23:55 無綫電視翡翠台，或23:40 高清翡翠台都睇到架! 錯過左都唔緊要，可以睇返翌日嘅重播，時間係14:50 無綫電視翡翠台，或17:45 高清翡翠台。
第六集 聖雅各福群會 —「後顧無憂」規劃服務
(播映日期：1月17日)
水哥同少蘭係一對無兒無女嘅恩愛夫妻，幾十年來彼此互相扶持。面對日漸年長、無親無故，兩位老人家開始擔心身後事安排。參加公益金資助會員機構 — 聖雅各福群會 - 後顧無憂規劃服務後，佢地終於放下心頭大石，喺社工協助下，妥善規劃生活，安然度過人生最後歷程。佢地揀選左一幅年輕時影嘅合照，盼望他日合葬
時長相守。
第七集 匡智健樂會
(播映日期：1月18日)
天生我材必有用！公益金相信每個人都應該有機會發掘潛力。智障人士智明無師自通學會彈琴，最鍾意彈《月亮代表我的心》。經過匡智健樂會義務鋼琴老師專業指導，智明嘅鋼琴造詣更上一層樓，無論古典或流行曲樣樣信手即彈。健樂會亦提供唔同類型嘅興趣班，邀請社會人士擔任活動義工，推動共融，協助有需要人士發展潛能。
第八集 母親的抉擇 — 幼兒之家
(播映日期：1月19日)
部份小孩雖然唔能夠喺母親嘅懷抱中成長，公益金資助嘅服務用愛同關懷陪伴嬰兒踏出人生第一段路，健康成長。今集，兩位熱心嘅「八十後」大學生將分享佢地做義工嘅感想。同每位「母親的抉擇」義工一樣，佢地希望每個小朋友都能夠盡快投入領養家庭，或者返到親生父母身邊，有一個屬於自己嘅家。
