唔知你有冇去過醫院呢? 周圍都係冷冰冰嘅機器同消毒水味，相信你一定感受過o個種不安、無助，甚至恐懼。住喺入面，滋味可想而知。智樂兒童遊樂協會就喺公益金嘅資助下，開始為瑪嘉烈醫院嘅病童提供醫院遊戲服務，希望透過遊戲幫助患病嘅孩子對醫療程序(例如手術、電腦掃描、抽血等)作好心理準備，同面對因治療同住院所帶來嘅恐懼。
等我介紹一個朋友大家認識啦！相片裡面嘅係Heidi，佢出世後確診患有先天性心臟病，需要長期住喺瑪嘉烈醫院兒童病房。陪住佢成長嘅只有病房入面冰冷嘅監控儀同埋呼吸機。
為o左讓Heidi得到全面發展，醫院遊戲服務就進駐左佢嘅生活。遊戲師利用各種新奇有趣嘅玩具同Heidi溝通，等Heidi喺治療期間都可以放開胸懷，快樂成長。Heidi喺醫護人員同媽媽長期嘅悉心照顧下漸漸康復，終於可以返到溫暖嘅屋企，過返正常小朋友快樂嘅生活。
其實公益金除o左服務兒童，仲有老人啦、青少年服務、長期病患者 、釋囚 、問題家庭... 總之兩隻手都數唔晒 。黎緊嘅日子我會為大家逐一介紹，想知多D 就密切留意我個 blog 啦！
